Mat 7 | NdeIBE | STEP | “Lingehluleli funa lani lehlulelwe.

Matthew 7

Ukwahlulela Abanye

1 “Lingehluleli funa lani lehlulelwe. 2 Ngoba ngaleyondlela elahlulela ngayo abanye lani lizakwehlulelwa ngayo, langalesosilinganiso elisisebenzisayo lani lizalinganiselwa ngaso.

3 “Ubonelani isicucwana esiselihlweni lomfowenu, unganqinekeli ugodo olukwelakho ilihlo? 4 Loba uzakutsho kanjani kumfowenu ukuthi, ‘Wothi ngikukhuphe isicucwana elihlweni lakho,’ wena ulokhu ulogodo kwelakho ilihlo? 5 Mzenzisi, qala ususe ugodo elihlweni lakho ukuze ubone kakuhle nxa usukhupha isicucwana esiselihlweni lomfowenu.

6 “Linganiki izinja okungcwele, njalo lingaphoseli imiceciso ezingulubeni ngokuba zizayinyathela ngezinyawo ziphinde ziphenduke zilidabudabule.

Celani, Dingani, Qoqodani

7 “Celani, lizaphiwa; dingani, lizafumana; qoqodani, lizavulelwa. 8 Ngoba wonke ocelayo uyaphiwa; odingayo uyafumana; lalowo oqoqodayo uzavulelwa umnyango.

9 “Ngubani kini madoda okuthi nxa indodana yakhe icela isinkwa ayiphe ilitshe na? 10 Loba ithi icela inhlanzi ayiphe inyoka? 11 Nxa lina okuthi loba libabi likwazi ukupha abantwabenu izipho ezilungileyo pho kangakanani uYihlo wenu osezulwini uzabapha izipho ezinhle labo abacela kuye! 12 Kuzo zonke izinto yenzani kwabanye lokho elifuna bakwenze kini, ngokuba lokhu yikho okugoqela uMthetho labaPhrofethi.

13 “Ngenani ngesango elincinyane ngokuba likhulu isango lendlela ibanzi eya ekubhujisweni, njalo banengi abangena ngalo.

14 Kodwa lincinyane isango lendlela ilukhonjwana eya ekuphileni, njalo balutshwana abayifumanayo.

Isihlahla Lezithelo Zaso

15 “Qaphelani abaphrofethi bamanga abeza kini bezigqokise isikhumba semvu kodwa ngaphakathi beyizimpisi ezifohlozayo.

16 Lizabazi ngezithelo zabo. Abantu bayawakha na amavini esihlahleni sameva, kumbe amakhiwane edolofiyeni na? 17 Kanjalo sonke isihlahla esihle sithela izithelo ezinhle, kodwa isihlahla esibi sithela ezimbi. 18 Isihlahla esihle ngeke sithele izithelo ezimbi njalo lesihlahla esibi kasitheli izithelo ezinhle. 19 Zonke izihlahla ezingatheli izithelo ezinhle ziyaganyulwa ziphoselwe emlilweni.

20 Ngakho-ke lizabazi ngezithelo zabo.

21 “Kakusibo bonke abathi kimi, ‘Nkosi, Nkosi’ abazangena embusweni wezulu, kodwa ngulowo kuphela owenza intando kaBaba osezulwini. 22 Abanengi bazakuthi kimi ngalolosuku, ‘Nkosi, Nkosi, kasiphrofethanga ngegama lakho na, njalo ngegama lakho sakhupha amadimoni senza lezimangaliso?’

23 Lapho-ke ngizabatshela kakuhle ngithi, ‘Ngivele kangilazi. Xekani kimi, lina benzi bobubi!’

Umakhi Ohlakaniphileyo Loyisiwula

24 “Ngakho lowo owezwayo amazwi ami la awenze unjengendoda ehlakaniphileyo eyakha indlu yayo edwaleni. 25 Latheleka izulu, izifula zachitheka, wavunguza umoya watshaya phezu kwaleyondlu; kodwa kayiwanga ngokuba yayigxiliswe isisekelo sayo edwaleni. 26 Kodwa lowo owezwayo lamazwi ami angawenzi unjengendoda eyisiwula eyakhela indlu yayo etshebetshebeni. 27 Latheleka izulu, izifula zachitheka, umoya wavunguza watshaya phezu kwendlu leyo yawa yabhidlika.”

28 UJesu eseqedile ukukhuluma lezizinto amaxuku abantu amangaliswa yikufundisa kwakhe, 29 ngokuba wafundisa njengomuntu olamandla, hatshi njengabafundisi babo bomthetho.